علی یکتا اونودا بیلمیرم

من سنی اونودا بیلمیرم، آخی 
اونوتسام نه لری اونودام گرک 
گؤیلره باخمیشیق آیلی گئجه ده 
اونوتسام گؤیلری اونودام گرک! 

دنیزی اونودوم، یا دالغالاری 
خاطیرن یادیمدان چیخایدی باری 
پاییزدا خزانی، قیشداسا قاری 
باهاردا گوللری اونودام گرک! 

دئ نئجه اونودوم من سنی نئجه؟ 
سئوگی دورنا دئییل پاییزدا کؤچه 
یوخوما گلیرسن منیم هر گئجه 
آیلاری، ایللری اونودام گرک! 

سنین خیالیندیر حسرتله باخان 
آدیندیر هر ساعات قارشیما چیخان 
قاریشیب شکلینه گؤزومدن آخان 
یاغیشی، سئللری اونودام گرک!

سینمده پشیمان اورگیم قالدی 
اوچدون اللریمده لعلگیم قالدی 
نه لری ایتیریب، باخ نییم قالدی 
 نه لری، نه لری اونودام گرک!